ஈழ ஆதரவு-எங்கள் முத்திரை மட்டுமல்ல "முகவரி"

ஈழத் தமிழர்களின் விடுதலைக்காக நடந்து வரும் பெரும் போரில் வெற்றி நோக்கி வீரப்போர் நடத்திக் கொண்டிருக்கும் "விடுதலை புலிகள்" அமைப்பிற்க்கு தமிழகத்தில் முன் எப்போதுமில்லாத வகையில் தற்பொழுது ஆதரவு அதிகரித்துள்ளது என்பது நிஜம்.
ஏனோ இந்த நிஜம் சில "சந்தர்ப்பவாதிகளால்" மறைக்க முயற்சிக்க படுகிறது. அதற்காக அவர்களால் பல காரியங்கள்,சதிகள் திரை மறைவில் தீட்டப் பட்டுள்ளன. அதிகாரம் தன் கையில் என்பதால் இந்த சந்தர்ப்பத்தை வைத்து தன் அரசியல் எதிரிகளை "விடுதலை புலிகள்" அமைப்பின் ஆதரவாளர்கள் என்று முத்திரை குத்தி, செய்யாத சதிகளை அவர்கள் செய்தார்கள் என்று பொய்க் குற்றம் சாற்றி சிறையில் அடைத்துவிட தி.மு.க. தலைவர் கருணாநிதி முயற்சிக்கிறார் என்பது நன்றாக தெரிய ஆரம்பித்து விட்டது.

தமிழக சட்டமன்றத்தில் கடந்த சில நாட்களாக சில காங்கிரஸ் உறுப்பினர்கள் தவறாமல் எழுப்பும் கேள்வி "விடுதலை புலிகளை ஆதரிப்பவர்கள் மீது நடவடிக்கை எடுக்கப்படுமா?" என்ற கேள்விதான்.
அதிலும் குறிப்பாக "வை।கோ. அவர்களை குறிப்பிட்டு அவரை சிறையில் அடைக்க வேண்டும்" என கேட்கிறார்கள். (கேட்க வைக்கப்படுகிறார்கள் என்பதே உண்மை) வை.கோ.அவர்களை சிறையில் அடைப்பதின் மூலம் தன் அரசியல் பழியையும் தீர்த்துக் கொள்ளலாம் காங்கிரஸையும் திருப்தி படுத்தி விடலாம் என்று தந்திர நரியாய் திட்டம் தீட்டிவிட்டார். அந்த திட்டத்தின் அடுத்தக் கட்டமாக வை.கோ.அவர்களின் கைது நடவடிக்கைகளை விரைவில் அரங்கேற்றுவார் என்பதை பெரும்பாலோர் அறிந்தே உள்ளனர்.

ஈழப் போருக்கு ஆதரவு தருவோருக்கு இதுவே பரிசு என்று மிரட்டும் அந்த "நல்ல உள்ளங்களுக்கு" இந்த இணையத்தளத்தின் மூலமாக சொல்லிக்கொள்கிறோம், விடுதலை புலிகளின் ஆதரவு என்பது வை.கோ.அவர்களின் தம்பிமார்களாகிய எங்கள் மீது குத்தப்பட்டுள்ள "முத்திரை" மட்டுமல்ல அதுதான் எங்களுக்கான "முகவரி". உங்கள்(கருணாநிதி) மிரட்டலுக்கு அஞ்ச நிங்கள் பெற்றெடுத்த பிள்ளைகளை போலோ, பேரனை போலோ கோழைகள் நாங்கள் அல்ல.

எதற்க்கும் எங்களை தயார் படுத்தியே எங்கள் தலைவர் வை.கோ. வைத்திருக்கிறார் என்பதை அறிவித்துக் கொள்கிறோம்.

ஈழப் பிரச்சினையும் இந்தியாவும்

இலங்கை பேரினவாத அரசினால் மீண்டும் தமிழ் மக்கள் வேட்டையாடத் தொடங்கப்பட்டிருக்கும் நிலையில் ஈழத்தமிழர் விஷயத்தில் தமிழக முதல்வர் கலைஞர் கருணாநிதியின் தடுமாற்ற பிதற்றல்களாலும் தமிழ் மக்களை ஏமாற்றும் மத்திய அரசுடனான கடித அரசியல் கண்கட்டி வித்தைகளாலும் தமிழக மக்களே வெறுப்படைந்து போயுள்ளனர்.

எப்போதுமில்லாதவாறு தற்போது விடுதலைப் புலிகளுக்கெதிராக தமிழக அரசு எடுத்து வரும் `தேவையற்ற' பாதுகாப்பு ஏற்பாடுகள், சோதனை கெடுபிடிகள், தேடுதல்கள் என்பவற்றால் தமிழகத்தில் யுத்தம் நடைபெறுவது போன்ற நிலையே இங்கு காணப்படுகின்றது.

இலங்கை கடற்படையினரால் தினமும் தமிழக மீனவர்கள் நடுக்கடலில் வைத்து கொல்லப்படுகிறார்கள். காலையில் மீன் பிடிக்கச் சென்றவர்கள் மாலையில் பிணமாக திரும்பி வருவதே தமிழக கடற்கரையோர கிராமங்களில் நிகழும் அன்றாட நிகழ்வுகளாகி விட்டன.

தமிழக மீனவரின் உயிரைப் பாதுகாக்க அவர்களின் ஜீவாதார பிரச்சினைக்கு ஒரு நிரந்தரத் தீர்வைப் பெற்றுக் கொடுக்க முடியாத தமிழக அரசு, இலங்கை கடற்படையின் கொலை வெறித் தாக்குதலில் இருந்து தமது மீனவர்களை அவர்களின் உடைமைகளை பாதுகாக்க முடியாத `தமிழக அரசு' இலங்கை கட்டுநாயக்க விமானத்தளம் மீது புலிகள் விமானத் தாக்குதல் நடத்தி விட்டார்கள் என்பதற்காக தமிழக கரையோரப் பகுதிகளில் போர்க்கால நடவடிக்கைகளில் இறங்கியிருப்பது தமிழக மக்களையே வருத்தமடைய வைத்துள்ளது.

தமது மீனவர்களுக்கு பாதுகாப்பை வழங்க மறுக்கும் தமிழக அரசு இலங்கை அரசு மீதும் அதன் கடற்படையினர் மீதும் மென் போக்கை கடைப்பிடித்து வருகின்றது.

ஆனால், விடுதலைப்புலிகள் தமது எல்லைக்குள் வந்து விடக் கூடாது என்பதற்காக கடற்பாதுகாப்பை அதிகரித்துள்ளதுடன், விடுதலைப் புலிகளின் விமானத் தாக்குதலை எதிர்கொள்ளவென விமான எதிர்ப்பு பீரங்கிகளை பொருத்தி வைத்துக்கொண்டு வானத்தை அண்ணாந்து பார்த்துக் கொண்டிருக்கின்றனர்.

விடுதலைப் புலிகளால் தமது நாட்டுக்கு எந்த விதப் பிரச்சினையும் ஏற்படாது என்பதனை நன்கு தெரிந்து வைத்திருக்கும் தமிழக,மத்திய அரசுகள் யாரைத் திருப்திப்படுத்துவதற்காக இவ்வாறான போர்க்கால நடவடிக்கைகளில் ஈடுபடுகிறதென சாதாரண இந்திய தமிழனும் கேள்வி கேட்கத் தொடங்கியுள்ளான்.

இந்திய கடற்படையை தமது கடற்படையுடன் கூட்டுரோந்தில் ஈடுபட வைப்பதற்காக தமிழக மீனவர்களையே பலியெடுத்து இந்திய அரசை அடிபணிய வைக்க இலங்கை அரசு முயற்சிப்பது தமிழக, மத்திய அரசுகளுக்கு தெரிந்திருந்தும் அவர்கள் இது விடயத்தில் இலங்கையரசையும் அதன் கடற்படையையும் பாதுகாக்க முனைவது தமிழக மீனவர்களை மட்டுமன்றி தமிழக மக்களையே கொதிப்படைய வைத்துள்ளது.

இந்நிலையில், தமிழக முதல்வர் கலைஞர் கருணாநிதியின் தடுமாற்ற அறிக்கைகளும் நழுவிச் செல்லும் நரித்தனமும் அவரும் ஒரு சாதாரண அரசியல் வாதியாகி விட்டாரோ என்ற கவலையை ஈழத்தமிழர்களுக்கு மட்டுமன்றி தமிழககத்திலுள்ளவர்களுக்கும் ஏற்படுத்தியுள்ளது.

இலங்கை கடற்படையுடன் கூட்டுரோந்துக்கு இணங்கியுள்ளதாக ஊடகங்களுக்கு கருணாநிதி அளித்த பேட்டியை பார்த்து பலரும் அதிர்ச்சியடைந்தனர். கூட்டுரோந்து அவசியமென வலியுறுத்திய கருணாநிதி அதனை பகிரங்கமாகவும் ஊடகங்களுக்கு தெரிவித்தார். இதனை தமிழக ஊடகங்கள் அதிமுக்கியத்துவம் கொடுத்து பிரசுரித்து ஒளி, ஒலி பரப்பின.

ஆனால், இதன் பின்னர் தமிழகத்தில் கருணாநிதிக்கு ஏற்பட்ட எதிர்ப்பை அவரே எதிர்பார்க்கவில்லை. வைகோ., அ.தி.மு.க. தலைவி ஜெயலலிதா பா.ம.க. தலைவர் டாக்டர் ராமதாஸ், பழ.நெடுமாறன், திருமாளவன், விஜயகாந்த் என பல கட்சியினரும் கருணாநிதியின் அறிவிப்புக்கெதிராக போர்க் கொடி தூக்கிய போது தான் நிலைமையின் விபரீதத்தை உணர்ந்து கொண்ட கருணாநிதி அவசர அவசரமாக மறுநாள் எலியும் தவளையும் கதை கூறி இலங்கை ,இந்திய கடற்படையின் கூட்டுரோந்தில் தமக்கு இணக்கமில்லை எனத் தெரிவித்து தப்பித்துக் கொள்ள முயன்றார்.

ஆனாலும், முதலில் யாருடைய வற்புறுத்தலுக்காக இலங்கை -இந்திய கடற்படைக் கூட்டு ரோந்துக்கு இணக்கம் தெரிவித்தார் என்பதை அவர் வெளியிடவில்லை. அத்துடன், ஈழத்தமிழர் விஷயத்தில் தான் அக்கறை உள்ளவன் என்பதை காட்டிக் கொள்வதற்காக மத்திய அரசுக்கு கடிதம் அனுப்பி தமிழக மக்களையும் ஈழத்தமிழரையும் முட்டாள்களாக்கவும் கலைஞர் முயற்சிப்பது அவருடைய 50 வருட அரசியல் வரலாற்றில் விரும்பப்படாத பக்கங்களாகவே இருக்குமென்கின்றனர் சில மூத்த அரசியல்வாதிகள்.

தமிழக மீனவர் பிரச்சினைக்கும் ஈழத்தமிழர் பிரச்சினைக்கும் தீர்வு காண வேண்டுமென கலைஞர் உண்மையில் நினைத்தால் அது அவருக்கு மிகவும் சாதாரண விடயம். மத்திய அரசுக்கு கலைஞர் சிறு அழுத்தம் கொடுத்தாலே போதும் . அனைத்தும் நன்றாகவே நடக்கும். ஆனால், கலைஞர் ஏனோ இவ்விடயங்களில் நழுவிச் செல்லும் கொள்கையை வகுத்துக் கொண்டிருக்கின்றார்.

ஈழத்தமிழருக்கு ஆதரவாக தான் செயற்பட்டால் அது ஜெயலலிதாவுக்கு பிரசார ஆயுதமாக பயன்பட்டு விடுமோ என கலைஞர் அச்சப்படுகிறார்.

தமிழகத்தின் செய்திதாள்களை தற்போது அதிகளவு ஆக்கிரமித்திருப்பது இரும்புக் குண்டு கடத்தல் விவகாரமாகவேயுள்ளது. தினமும் இரும்புக் குண்டுகள் மீட்பு, சந்தேக நபர்கள் கைது என்ற செய்திகளே வெளிவந்து கொண்டிருக்கின்றன. இச்சம்பவங்களுடன் விடுதலைப் புலிகள் தொடர்பு படுத்தப்பட்டுள்ளனர். இரும்புக் குண்டுகளை கடத்தி புலிகள் வெடிகுண்டுகள் தயாரிப்பதாக கூறப்படுகின்றது.

இரும்புக் குண்டுகள் கடத்தலுடன் தம்மை தொடர்பு படுத்தியதை மறுத்துள்ள விடுதலைப் புலிகளின் அரசியல் துறைப் பொறுப்பாளர் சு.ப.தமிழ்ச்செல்வன் `நாம் தற்போது இரும்புக் குண்டுகளில் வெடிபொருட்கள் தயாரிக்கும் நிலையை கடந்து எவ்வளவோ காலமாகிவிட்டது. தற்போது நவீன தொழில்நுட்ப யுகத்தில் நாம் இருப்பதால் எமக்கு இரும்புக்குண்டுகள் தேவையில்லையெனக் கூறியுள்ளதுடன் தம்மிடம் அளவுக்கதிகமாக ஆயுதங்கள், வெடிபொருட்கள் இருப்பதால் இரும்புக் குண்டுகளை கடத்த வேண்டிய தேவை தமக்கில்லையெனவும் தெரிவித்துள்ளார்.

உண்மையும் அதுதான். இந்த இரும்புக் குண்டு (போல்ஸ்) கடத்தல்களுடன் கொழும்பு நகர வாகன உதிரிப் பாக விற்பனை வியாபாரிகளே தொடர்புபட்டுள்ளதாக தெரியவருகிறது. சட்டத்திற்குட்பட்டு இந்த இரும்புக் குண்டுகளை கொண்டு வந்தால் அதிக வரி செலுத்த வேண்டுமென்பதால் கடல்வழியாக இவற்றை கடத்தி வருவதாக தெரிவிக்கப்படுகின்றது. இது தமிழகத்திலேயே பலருக்கும் தெரிந்திருந்தும் ஊடகங்கள் மட்டும் புலிகளுடன் தொடர்புபடுத்தி செய்திகளை வெளியிட்டு பரபரப்பை ஏற்படுத்துகின்றன.

இதற்கும் சில காரணங்களுண்டு. பரபரப்பான சம்பவங்களை மிகைப்படுத்தி ஊடகங்கள் வெளியிட்டு வருவதாலும் அந்த விடயங்களுடன் சம்பந்தப்பட்டால் பிரபலமாகிவிடலாமென நினைக்கும் சில பொலிஸ் அதிகாரிகளுமே இந்த இரும்புக் குண்டு கடத்தல்களுடன் விடுதலைப் புலிகளை தொடர்பு படுத்திவிட்டு தமது புகைப்படங்களையும் பெயர்களையும் செய்திதாள்களில் பார்த்து பெருமைப்பட்டுக் கொண்டிருக்கின்றனர். தாம் புலிகளுடன் சம்பந்தப்பட்டவர்களல்ல வியாபாரிகளென பிடிபட்டவர்கள் தெரிவித்தாலும் அதனை பொருட்படுத்தாது அவர்களுக்கு புலி முத்திரை குத்திவிட்டு செய்திதாள்களுக்கு, பெரிய கடத்தலை முறியடித்து புலிகளை கைது செய்துள்ளதாக பேட்டியளிக்கின்றனர்.

இவ்வாறே பல சம்பவங்கள் தேவையற்ற வகையில் புலிகளுடன் தொடர்பு படுத்தப்பட்டு வருவதால் தமிழகத்தில் புலிகள் பெருகிவிட்டார்களென்ற எண்ணம் சில ஈழத்தமிழர் விரோத கட்சிகளுக்கு ஏற்படுவதால் இதனை அவர்கள் தமது அரசியலுக்கு பிரசார ஆயுதமாக பாவிக்கின்றனர்.

புலிகளின் விமானத் தாக்குதலும் தமிழக மக்களின் உணர்வும்

கொழும்பு, கட்டுநாயக்காவிலுள்ள இலங்கை விமானப்படையின் தளம் மீது விடுதலைப் புலிகளின் இரு விமானங்கள் நடத்திய குண்டு வீச்சு தாக்குதல் ஈழத்தமிழர்களைப் போன்றே தமிழக மக்களிடமும் ஒரு எழுச்சியையும் மகிழ்ச்சியையும் ஏற்படுத்தியது.

26 ஆம் திகதி திங்கட்கிழமை அதிகாலை இடம்பெற்ற விமானத் தாக்குதல் தொடர்பாக தமிழகத்தின் அன்றைய தின மாலைப் பத்திரிகைகளான தமிழ்முரசு, மாலைமலர், மாலைமுரசு உட்பட பல ஊடகங்கள் உணர்ச்சிகர தலைப்புகளுடன் புலிகளின் தலைவர் பிரபாகரன் அவரது விமான `பைலட்டுகள்' தாக்குதலுக்கு புறப்படும் விமானம் போன்ற படங்களுடன் முன் பக்கத்தில் பிரசுரித்திருந்ததுடன் இலங்கையரசின் ஆட்டம் இத்துடன் முடிந்தது என்பது போன்ற செய்திகளையும் வெளியிட்டிருந்தன.

அன்றைய தினம் அங்குள்ள பத்திரிகை விற்பனை நிலையங்களில் குறிப்பிட்ட பத்திரிகைகள் சில நிமிடங்களில் விற்றுத் தீர்ந்ததாகவும் இவ்வாறு எந்தவொரு சந்தர்ப்பத்திலும் தமது கடைகளில் பத்திரிகைகள் விற்பனையாகவில்லையெனவும் கடை உரிமையாளர்கள் தெரிவித்தனர்.

இதைவிட செல்லிடப் பேசிகளூடாகவும் விமானத் தாக்குதல் தொடர்பான செய்திகளை பரிமாறி வாழ்த்துக்களை பலர் தெரிவித்துக் கொண்டதையும் அவதானிக்க முடிந்தது. பல அரசியல் தலைவர்கள் கூட இத்தாக்குதல் குறித்து பகிரங்க கருத்துக்களை வெளியிடாத போதும் தமக்கு நெருக்கமானவர்களிடம் புலிகளின் விமானப்படை தொடர்பாக மகிழ்ச்சியை வெளிப்படுத்தினார்கள்.

இந்நிலையில் புலிகளின் விமானத் தாக்குதலையடுத்து தமிழக அரசு எடுத்து வரும் நடவடிக்கைகள் தான் முதலமைச்சர் கருணாநிதி மீது பலதரப்பட்ட மக்களையும் விசனமடைய வைத்துள்ளன. இது குறித்து வெளிப்படையாகவே ஊடகங்களில் பலரும் குறிப்பிட்டுள்ளனர்.

தமிழ் நாட்டை பொறுத்தவரை ஈழத்தமிழருக்கும் விடுதலைப் புலிகளுக்கும் பெருகிவரும் ஆதரவைக் கண்டு அச்சமடையும் மத்திய அரசு முதலமைச்சர் கருணாநிதிக்கு கொடுத்து வரும் அழுத்தம் காரணமாகவே தற்போதைய பரபரப்பு நடவடிக்கைகள் அரங்கேற்றப்படுவதுடன் விடுதலைப் புலிகளின் ஆதரவாளர்கள் கைது செய்யப்படுவார்களென்ற அறிவிப்பும் வெளியாகியுள்ளது.

இந்தியாவுடன் நட்புறவை வளர்க்க புலிகள் பெரும் பிரயத்தனம் செய்து வரும் நிலையில் அதனைக் கெடுப்பதற்கென்றே பல சக்திகளும் பல ரூபங்களில் செயற்பட்டு வருகின்றன. இரும்புக் குண்டு கடத்தல், தமிழக மீனவர்களை புலிகளே சுட்டுக் கொல்கிறார்கள் என்ற பிரசுரம், தமிழகத்தில் வன்முறை அதிகரிப்பு போன்ற நாடகங்கள் இந்த சதியின் சில பகுதிகளேயாகும்.

இதேவேளை, இந்தியத் தமிழர்களையே இனவெறியுடன் தமது எதிரிகளாகப் பார்க்கும் மலையாள பெருச்சாளிகள் (உதாரணம்:சிவசங்கர் மேனன்) இந்தியப் பிரதமரின் ஆலோசகர்களாக, வெளியுறவு செயலர்களாக பாதுகாப்பு அமைச்சராக இருக்கும் வரை ஈழத்தமிழர் பிரச்சினையில் ஈழத்தமிழருக்கு சார்பான எந்த முடிவையும் இந்திய மத்திய அரசு எடுக்காதென தெரிவிக்கும் தமிழகத்தின் மூத்த அரசியல் வாதிகள், தமிழக அரசும் முதுகெலும்பில்லாது இரண்டுங்கெட்டான் நிலையிலிருப்பது ஈழத்தமிழர்களைப் பொறுத்தவரை துரதிர்ஷ்டவசமானது என்கின்றனர்.

அரசியல் வரலாற்றில் பொன்விழாவை கொண்டாடும் தமிழக முதல்வர் கலைஞர் கருணாநிதி சாதாரண அரசியலுக்கு அப்பாற்பட்டு ஈழத்தமிழர் பிரச்சினையை அணுக வேண்டுமென்பதே அனைவரினதும் விருப்பமாகும்.

புலிக்கொடி ஏந்திய கனடா தமிழ் வீரன்

ஈழத் தமிழர் பிரச்சனையை அனைத்துலக சமூகத்துக்கு எடுத்துச் சொல்லும் நோக்கத்துடனேயே நான் மைதானத்தில் உள்நுழைந்தேன் என்று அனைத்துலக துடுப்பாட்ட மைதானத்தில் தமிழீழத் தேசியக் கொடி ஏந்தி பரபரப்பை ஏற்படுத்திய கனேடிய இளைஞரான மயூரன் தெரிவித்துள்ளார்.

தாயக மண்ணிலிருந்து நான்கரை வயதில் கனடிய நாட்டுக்கு நான் வந்தேன்.

பொதுவில் துடுப்பாட்டாப் போட்டிகளில் எனக்கு ஆர்வம் உண்டு. கனடாவில் நான் இருப்பதால் கூடைப்பந்தாட்டம் போன்ற போட்டிகளைத்தான் அதிகம் பார்ப்பதுண்டு. ஆனால் மேற்கிந்திய தீவுகளுக்கு துடுப்பெடுத்தாட்டப் போட்டிகளை பார்க்கச் சென்றது என்பது எம்முடைய பிரச்சினை எல்லோருக்கும் தெரிய வேண்டும் என்பதற்காகத்தான்.

இப்போதுதான் முதல் முறையாக துடுப்பாட்டப் போட்டியைப் பார்க்கச் சென்றேன்.

எங்களுடைய மக்கள் எல்லோருக்கும் எங்கள் நாட்டில் நடைபெறுவது என்ன என்று தெரியும். அனைத்துலக மன்னிப்புச் சபையும் உலகக் கிண்ண துடுப்பாட்டப் போட்டியையொட்டி பரப்புரை மேற்கொண்டது. ஆனால் சிறிலங்கா அரசாங்கத்தின் முயற்சியால் அது தடுத்து நிறுத்தப்பட்டது.

ஆகையால் அனைத்துலக மன்னிப்புச் சபையின் பரப்புரைக்கு ஆதரவாகவும் எமது பிரச்சனையை அனைத்துலகத்துக்குத் தெரியப்படுத்த வேண்டும் என்றும் கருதி இந்த இளைஞராக இருப்பதால் நேரடி நடவடிக்கையை மேற்கொண்டேன்.

என்னுடைய நண்பர்களுடன் நான் மேற்கிந்தியத் தீவுகளுக்குச் சென்றேன்.

நாம் மேற்கொண்ட நடவடிக்கையானது முன்னரே திட்டமிட்டதுதான்.

அந்த மைதானத்தில் பல்வேறு நாடுகளின் கொடிகளெல்லாம் இருக்கின்றபோது எங்களுடைய நாட்டினது புலிக்கொடியும் அதாவது தமிழீழத் தேசியக் கொடியைக் கொண்டு போனால் என்ன மாதிரி விளைவை உண்டாக்கும்- பரபரப்பை ஏற்படுத்தும் என்று திட்டமிட்டுத்தான் இதனைச் செய்தோம்.

அவுஸ்திரேலியாவுக்கும் சிறிலங்காவுக்கும் இடையேயான போட்டியைத் தெரிவு செய்யக் காரணம் உண்டு.

சிறிலங்காவுக்கும் அவுஸ்திரேலியாவுக்கும் இடையே நெருக்கமான உறவு உண்டு. சிறிலங்காவின் அமைச்சரான கேகலிய ரம்புக்வெல, அவுஸ்திரேலியாவுக்குச் சென்று எங்கள் மக்களின் செயற்பாடுகளைத் தடுக்கப் பார்க்கிறார். எங்களுடைய போராட்டத்தைத் தடை செய்ய அவர் முயற்சித்து வருகிறார். ஆகையால்தான் தற்போது இந்தப் போட்டியை நாம் தெரிவு செய்தோம்.

எங்களுக்கு மைதானத்தின் எந்தப் பகுதியைத் தெரிவு செய்ய வேண்டும் என்று வெளியிலிருந்து தெரியவில்லை. மைதானத்தின் பகுதியில் நகரக்கூடிய இடங்களும் இருந்தன.

மைதானத்தைச் சுற்றி மிகவும் வலுவான பாதுகாப்பாகத்தான் இருந்தது. ஆனால் சரியான நேரத்தையும் சரியான இடத்தையும் நாம் தெரிவு செய்தமையால்தான் எமது திட்டம் வெற்றி பெற்றது.

மைதானத்தில் சிறிலங்கா அணி நிற்க அவுஸ்திரேலிய அணி மட்டையெடுத்து ஆடும்போதுதான் இறங்க வேண்டும் என்று திட்டமிட்டேன். அதன்படி நான் மைதானத்தில் இறங்கி பிட்ச் பகுதிக்குச் செல்ல தீர்மானித்தேன்.

ஆனால் மைதானத்தில் நின்றிருந்த சிறிலங்கா அணியினரோ அச்சத்துடன் இருந்தனர். அந்தப் பாதிப்பைவிட வந்திருக்கும் பார்வையாளர்களுக்கு விடயத்தைக் கொண்டு செல்ல வேண்டும் என்று கருதினேன். அதற்கேற்ப பார்வையாளர்களும் என்னை உற்சாகப்படுத்தினர். பார்வையாளர்கள் வரிசையில் இலங்கையர்களும் இருந்திருக்கக் கூடும். ஆனால் எந்தப் பகுதியிலிருந்து உற்சாகமளித்தனர் என்பது எனக்குத் தெரியவில்லை.

நான் மைதானத்தில் இறங்கும் வரை திட்டமிட்டதனை சரியாக முடிக்க வேண்டும் என்று கருதிக் கொண்டிருந்தேன். மைதானத்தில் இறங்கிய பின்னர் உற்சாகமாகவும் மகிழ்ச்சியாகவும் இருந்தேன்.

சிறிலங்கா அணியினர் அச்சத்துடனும் அவமானப்பட்ட நிலையிலுமாக அவர்கள் முகம் இருந்ததை நான் சரியாகப் பார்த்தேன்.

நான் மைதானத்தில் தமிழீழத் தேசியக் கொடியுடன் இறங்கிய உடனே அங்கிருந்த காவல்துறையினர் என் பின்னால் வந்தனர். அவர்கள் என்னை நோக்கி வந்தபோது அவர்களுக்கு ஒத்துழைப்புத் தரும் விதத்தில் நான் எனது கையை உயர்த்தினேன்.

இதனை நான் விளையாட்டுக்குச் செய்யவில்லை. பரப்புரைக்காகத்தான் செய்கிறேன் என்பதனை அனைத்துலக துடுப்பாட்டச் சபையினரும் புரிந்து கொள்ள வேண்டும். அவர்களுக்கு இடையூறு செய்யவில்லை என்பதை வெளிப்படுத்த வேண்டும் என்பதற்காகத்தான் நாம் அவர்களோடு ஒத்துழைத்தேன்.

நான் செய்தது ஒரு போராட்ட ரீதியான செயல்தான். விளையாட்டுக்காக பிழையாக நான் செயற்படவில்லை.

நான் மைதானத்திலிருந்து அப்புறப்படுத்தப்பட்டபோது, முதலில் அவர்களிடம் நான் மன்னிப்பு கேட்டுக் கொண்டேன். எங்கள் நாட்டில் இப்படியான பிரச்சினைகள் நடைபெறுகின்றன. அதனை வெளிப்படுத்தவே இத்தகைய செயற்பாடு மேற்கொண்டோம் என்றும் விளக்கம் அளித்தேன்.

மைதானத்திலிருந்த போதுதான் அனைத்துலக துடுப்பாட்டச் சபையினர் விசாரித்தனர்.

எந்த ஒரு பார்வையாளரும் மைதானத்தில் இறங்கக் கூடாது என்பதுதான் அந்த அதிகாரிகளின் சட்டம். என்னிடம் விசாரணை செய்த ஒவ்வொரு உயர் அதிகாரியிடமும் என்னுடைய மன்னிப்பைக் கூறி அத்துடன் எமது அரசியல் பிரச்சினையையும் நான் விளங்கப்படுத்தினேன். எதற்காக இந்தச் செயலை செய்தேன் என்றும் விளக்கினேன்.

மைதானத்திலிருந்து அப்புறப்படுத்தப்பட்டு அங்கிருந்து புலனாய்வுத்துறை தலைமை அலுவலகத்துக்குக் கொண்டு சென்றனர்.

முதலில் என்னை குற்றவாளியாகக் கருதித்தான் 40 அல்லது 50 பேர் கொண்ட புலனாய்வுப் பிரிவினர் விசாரித்தனர். என் மீது சட்ட நடவடிக்கை மேற்கொள்ளத்தான் அவர்கள் முயற்சித்தனர்.

ஆனால் ஒவ்வொரு அதிகாரியும் என்னிடம் விசாரித்த போதும் விளக்கம் கூறினேன். அதன் பின்னர் எனது சார்பில் கதைக்கத் தொடங்கினர்.

அதன்பின்னர் அந்த நாட்டிலிருந்து வெளியேறுமாறு என்னைக் கேட்டுக் கொண்டனர். ஏனெனில் இன்னொரு போட்டிக்கு நான் திரும்பவும் போய் இப்படியான ஒரு சம்பவம் நடப்பதை அவர்கள் விரும்பவில்லை. அப்படி நடப்பதன் மூலமாக வெளிநாட்டினருக்கு மேற்கிந்திய தீவுகள் குறித்து பிழையான அபிப்பிராயம் வருமென கருதினர். ஆகையால் அதனை ஏற்று அந்நாட்டிலிருந்து வெளியேற இணங்கினேன்.

மேற்கிந்திய தீவுகள் நாட்டின் காவல்துறையினரின் பாதுகாப்புடன் அங்கிருந்து வெளியேறினேன்.

கனடா நாட்டுக்கு நான் திரும்பியபோதும் இதுவரை எதுவித விசாரணைகளும் மேற்கொள்ளப்படவில்லை. விசாரணைகள் வரலாம். அதனை எதிர்கொள்ளவும் நான் தயாராக உள்ளேன்.

ஆனால் கனடா நாட்டினது சட்டத்தை நாம் சரியான முறையில் கையாண்டால் எங்களுக்கு எதுவித பிரச்சனையும் வராது என்ற நம்பிக்கையுடன்தான் நான் மைதானத்திற்குச் சென்றேன்.

நான் மேற்கொண்ட நடவடிக்கையானது ஊடகங்களில் படங்களுடன் வெளியானதன் மூலம் எனது நோக்கம் நடந்தேறியிருப்பதால் மிகவும் உற்சாகமடைந்திருக்கிறேன். எமக்கு மட்டுமல்ல தமிழீழத்திலும் புலம்பெயர் நாடுகளிலும் உள்ள அனைத்து இளைஞர்களுக்கும் உற்சாகத்தைக் கொடுக்கும் என்று கருதுகிறேன்.

நான் மேற்கொண்ட செயற்பாடு சரியானது என்று இளைஞர்கள் பலரும் தொடர்பு கொண்டு தெரிவித்ததோடு தங்களை அழைத்துச் செல்லாதது குறித்து கோபமடைந்தும் உள்ளனர்.

நாம் வெற்றி கிடைக்கும்வரை சிந்திக்க வேண்டும். நாங்கள் பெருந்தொகையில் திரண்டு போராட்டம் நடத்திய போதும் அனைத்துலகத்தின் கவனத்தை ஈர்க்கவில்லை. இத்தகைய புதிய வடிவங்களினூடே தொடர்ச்சியாக எமது செயற்பாடுகளை மேற்கொள்வோம்.

எங்களுடைய தேசியத் தலைவரின் விருப்பத்தின்படி அதாவது எமது தேசியத் தலைவர் அவர்கள் ஒருமுறை, வெளிநாட்டில் இருக்கும் தமிழ் இளைஞர்கள் அடுத்த கட்டப் போராட்டத்துக்கு முன்வர வேண்டும் என்று கூறியிருந்தார். நாங்கள் பீனிக்ஸ் பறவை போல் எழும்ப வேண்டும் என்றும் கூறினார்.

அதற்கேற்ப செயற்திட்டங்களையும் வடிவங்களையும் மாற்றி அனைத்து தமிழ் இளைஞர்களும் முன்வந்தால் நம் பிர்சினைக்கு விரைவில் நாம் தீர்வு காண்போம் என்றார் மயூரன்.

"தமிழ்நாதம் இணையதளத்திற்க்கு மயூரன் வழங்கிய நேர்காணல்"